ཀ་རྩོམ་ཁ་བྲལ་འཕྲིན་ཡིག།

ཀ་ནས་ལས་ཀྱིས་འབྲེལ་བའི་བྱམས་པ་ཁྱོད། །
ཁ་དོག་མཚར་བས་སྙིང་དུ་སྡུག་ན་ཡང་། །
ག་གེ་མོ་ཡི་རྒྱུ་མཚན་ཞིག་ལ་བརྟེན། །
ང་ཡི་གཏན་གྲོགས་འོས་པའི་འབབ་དང་བྲལ། །

ཅ་ལ་རྒྱུ་ནོར་མེད་པའི་སྤྲང་པོ་ང་། །
ཆ་མེད་ཡ་མེད་གཅིག་པུར་སྡོད་ཉམས་སྤྲོ། །
ཇ་ཆང་ལོངས་སྤྱོད་འདོད་པའི་བཞིན་བཟང་ཁྱོད། །
ཉ་གང་གྲོགས་བཟང་འཚོལ་ནས་ཕེབས་པར་ཞུ། །

ཏ་ཟི་ཀླ་ཀློའི་རིགས་བརྒྱུད་མ་ཡིན་ཞིང་། །
ཐ་མལ་འོན་ལོང་ལྐུགས་པའང་ཁྱོད་མིན་པས། །
དང་དང་ཕྱི་མའི་དོན་ཆེན་བསྒྲུབ་ནུས་པའི། །
ན་མཉམ་གྲོགས་བཟང་དམ་པ་ངེས་པར་ཐོབ། །

པ་ཏྲ་རི་མོས་མཛེས་པའི་ཁང་བཟང་སོགས། །
ཕ་མས་བསྒྲུབས་པའི་རྒྱུ་ནོར་ལོངས་སྤྱོད་ནི། །
བཛྲ་དྷ་ཛྭ་ང་ལ་མ་མཆིས་པས། །
མ་དག་འཁོར་བའི་གནས་ལ་ཆགས་དོན་མེད། །

ཙཱ་རི་འདྲ་བའི་སྦས་ཡུལ་དམ་པ་རུ། །
ཚ་གྲང་ཁྱད་བསད་དཀའ་ཐུབ་བསྒྲུབ་ཏུ་འགྲོ། །
ཛ་རོང་འཁོར་བའི་གནས་ལས་ཐར་ཆེད་དུ། །
ཝ་ལེར་གསལ་བའི་ཤེས་རབ་བསྒོམ་དུ་འགྲོ། །

ཞྭ་ལྟར་གྱོན་མཐར་ལྷམ་ལྟར་དོར་མིན་ཡང་། །
ཟ་ཟི་འ་འུར་ངང་དུ་སྡོད་པ་ལས། །
འ་ཅག་མི་ཚེ་ཆུད་ཟོས་མ་གཏོང་བར། །
ཡ་རབས་ངང་ཚུལ་སྐྱོང་བའི་ཐབས་ཚུལ་ཡིན། །

ར་རི་བྲལ་བའི་བཞིན་བཟང་ཁྱོད་ཀྱི་ཞལ། །
ལ་ལུང་དུ་མའི་ཕག་ཏུ་ཡིབ་ན་ཡང་། །
ཤ་ཚ་ཅན་གྱི་ང་ཡི་ཡིད་མཁའ་རུ། །
ས་སྟེང་འདི་ནང་སྡོད་རིང་ཤར་བར་སྨོན། །

ཧ་ཧ་དགའ་སྤྲོའི་ངང་དུ་སྡོད་བྲོ་ཡང་། །
ཧ་རེ་ཧོ་རེ་མང་བས་བར་ཆད་བྱུང་། །
ཨ་ཕ་རྒན་པོ་བློ་ཐག་ཆོད་ཚར་བས། །
ཨ་རོགས་ཁྱོད་རང་བསམ་མནོ་ཞིབ་མོར་ཐོངས། །